‘ट्यापे–मुन्द्रे’ बढ्न थालेको भन्दै ‘सफाइ अभियान’ सुरु

काठमाडौं,फागुन १५ । प्रहरीले राजधानीका टोलहरुमा ‘ट्यापे–मुन्द्रे’ बढ्न थालेको भन्दै ‘सफाइ अभियान’ सुरु गरेको छ । महानगरीय प्रहरी परिसर काठमाडौंले सोमबारबाट सुरु गरेको अभियान अन्तर्गत एकैपटक सात सय ११ जना पक्राउ परेका छन् । पक्राउ पर्ने अधिकांश किशोर उमेर समूहका छन् । परिसरले मातहतका प्रहरी वृत्त र प्रभागलाई सर्कुलर नै जारी गरी टोलमा अस्वाभाविक हुलियामा रहेकाहरूलाई पक्राउ गरेको हो । पक्राउ परेका सबैसँग प्रारम्भिक अनुसन्धान भइरहेको परिसरका प्रवक्ता चक्रबहादुर सिंहले जानकारी दिनुभयो । सिंहका अनुसार पक्राउ परेका सबै जनालाई एक रात अनिवार्य रूपमा हिरासतमा राखिनेछ । अभियानअन्तर्गत प्रहरी वृत्त महाराजगन्जबाट ६५, बौद्धबाट ७१, बानेश्वरबाट ८३, कालिमाटीबाट ९३ र बलाजुबाट १०५ लाई पक्राउ गरेको छ । त्यस्तै, परिसर मातहतका १३ वटा प्रभागबाट मात्रै दुई सय २५ जनाई पक्राउ गरिएको छ । पक्राउ गरिएकामध्ये तीन महिला छन् ।राजधानीमा पछिल्ला दिनमा भएका चोरी, डकैत, लुटपाट मात्र नभई हत्यामा समेत किशोर उमेर समूहकाहरू नै संलग्न भएको भेटिएपछि प्रहरीले यो अभियान सुरु गरेको हो । पक्राउ परेकामध्ये गाँजा, चरेसलगायत लागुऔषध दुव्र्यसनीमा फसेकाहरू रहेका प्रहरीले जनाएको छ । सडकका आवारा तथा गुन्डाहरूलाई विशेष निगरानी गरिएको पनि प्रहरीले जानकारी दिएको छ । डिएसपी सिंहले भन्नुभयो, ‘समाजमा अशान्ति मच्चाउने, गँजेडी, आवारा, गुन्डाहरूलाई विशेष निगरानीमा राखिएको छ, साथै अस्वाभाविक रूपमा जुल्फी पाल्ने, महिला जिस्क्याउने, चोक–चोकमा दिनभर बरालिएर बस्नेहरूलाई पनि निगरानीमा राखिएको छ, पहिलो अभियानअन्तर्गत पनि उनीहरू नै धेरै समातिएका छन्, अब हामीले उनीहरू सबैको रेकर्ड बनाउँछौँ ।’ डिएसपी सिंहका अनुसार यो अभियान निरन्तर चल्नेछ । टोलका मुन्द्रेहरूलाई तह लगाउने यो अभियान नयाँ भने होइन, यसअघि पनि यस्ता अभियान चलाइने गरिन्थे । अभियानअन्तर्गत पक्राउ गरिएकाहरूमाथि अनुसन्धान गरी शंका लागेकामाथि म्याद थप गरी पुनः अनुसन्धान गरिने र कारबाही प्रक्रिया अघि बढाइने जनाइएको छ ।

Category: News