छोराका लागि मृगौला दान

सन्तान भन्ने कुरा प्राण भन्दा पनि प्यारो हुन्छ । यो कुरा कतिपय निर्दयी मान्छेका लागि लागु नहुन सक्छ । तर आम मानिसमा यो लागु हुन्छ । यो कुरा बेलायतका एक दम्पती आमाबुवाले प्रमाणित गरेका छन् । छोराको उपचारमा मृगौला दान गर्न दुबै जना कस्सिएपछि आखिर नेपालको गाइ की त्रिशुल शैलीमा कसले मृगौला दिने भन्ने कुराको छिनोफानो गर्नुपर्‍यो । बेलायतको बर्मिंघमका बासिन्दा मुन्तजार युनिस र उनकी श्रीमती किरण युनिस दुबैजनाले छोरा एडम युनिसका लागि मृगौला दान आफैले गर्ने अड्डी लिएपछि आखिर गोला प्रथा गरेर बाउ आमा मध्ये कसले मृगौला दान गर्ने भन्ने कुराको टुंगो लगाइयो । गोला प्रथा गर्दा मुन्तजारले नै बाजी जिते र छोराका लागि मृगौला दान गर्न पाए । छोरालाई मृगौला दिन नपाएर आमा किरण थकथकाइन् । निकै जटिल रोग लागेर मृगौलाले काम गर्न छाडेका एडम आखिर बुवाको मृगौला पाएर बाँचे । क्विन एलिजावेथ अस्पतालमा मुन्तजारको मृगौला सफलतापूर्वक एडममा प्रत्यारोपण गरियो । छोरालाई मृगौला दिएका मुन्तजार अहिले केवल २८ वर्षका छन् । उनले अझै धेरै जिवन जिउनु छ । तर उनले आफ्नो दीर्घायू भन्दा छोराको जिवन ठूलो माने । त्यसैले छोरालाई मृगौला दिए । धन्य यी इश्वर जस्ता बाउ आमालाई

Category: Health, interesting, News